تغاريب

بسم الله الرحمن الرحيم





وش كثرهـا الأوهـام تلعـب براسـي
يحضْر فكري ساعـة منـك و يغيـب
محزون قلبي مـا لقـى لـه مواسـي
مطعون في جوفي جروحي معاطيـب
مشتاق لـك فـي يقظتـي و النعاسـي
ياقايـدة كــل البِـنِـي الرعابـيـب
هزيتـي أشواقـي بـوقـت قيـاسـي
ما فادني عرفـي و ذيـك التجاريـب
خدك يفوق البـدر و الصـدر ماسـي
لا شافك المهمـوم مـن همـه يطيـب
اذكرك و انسى كـل ربعـي و ناسـي
ودي احقـق لـك جميـع المطالـيـب
لا تقطعيـن الوصـل و يزيـد ياسـي
يكفيني اللي خِطّْ لـي فـي المكاتيـب
تكفيـن تروينـي عـروقـي يبـاسـي
لمّـي بقايـا وحـدتـي و التغـاريـب
مدّي يدك يمّـي و ضمّـي احساسـي
كلّي وفـاء لأجلـك و كلّـي تراحيـب
زدتي طمـوح و زاد فينـي حماسـي
يا مهـرة مـا ناشهـا مخلـب الذيـب
قدمت عـذري لـك و فيـه إلتماسـي
ياليت من يـدري بمـا يخفـي الغيـب
بيّنـت مـا كنّيـت رغـم إحتراسـي
و الناس تخطي بعض الأوقات و تصيب
ما كـل ملبـوس يجـي فـي مقاسـي
و أسابق اهل الطيب في مكسب الطيب
بأصبر على طول المـدى و المآسـي
ما يندرى !سـود الليالـي وش تجيـب